Сүхбаатар дүүргийн 13 дугаар хороо, Хайлааст Дарь-Эхийг холбосон авто замаас Сэлбэ дэд төвтэй холбогдох 960 метр авто замын бүтээн байгуулалт үргэлжилж байна. Тус байршилд нийслэлийн Засаг дарга бөгөөд Улаанбаатар хотын Захирагч Б.Пүрэвдагва ажиллалаа.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Далангийн зам буюу Сэлбэ дэд төвөөс Хайлааст хүртэлх 960 метр авто замыг нийслэлийн Замын хөгжлийн газар, Хайлаастаас Дарь эхийг холбосон 3.2 км замыг Дэлхийн банкны санхүүжилтээр барьж байна. Нийт 4.2 км иж бүрэн авто замыг ирэх арваннэгдүгээр сард ашиглалтад оруулахаар ажиллаж байгаа юм. Зам ашиглалтад орсноор Долоон буудал чиглэлийн замын хөдөлгөөний ачаалал 40 хувиар буурах тооцоололтой. Улаанбаатар хотод барьж байгаа авто зам ус зайлуулах хоолойтой байх шаардлагатайгаас гадна явган хүний болон дугуйн замыг цогцоор нь гүйцэтгэсэн байна. Үүний дараа ашиглалтад хүлээж авна гэдэг шаардлагыг тавьж байна. Цаашид энэ жишгийн дагуу нийслэлд хийх бүх замыг ус зайлуулах хоолойтой, явган хүний болон дугуйн замтай хийдэг байх стандартыг мөрдөнө. 2023 оны үерээр энэхүү даланг давж ус орж ирсэн тохиолдол гарсан. Тиймээс үерийн хавтан бэхлэлтийн гүйцэтгэлд онцгой анхаарч байна” гэлээ.
Нийслэлийн Замын хөгжлийн газрын Засвар арчлалт, хяналтын хэлтсийн дарга О.Энхбаатар “Хайлааст Дарь-Эхийг холбосон авто замаас Сэлбэ дэд төвтэй холбогдох энэхүү 960 метр авто зам нь долоон метр өргөн, хоёр талаараа явган хүний замтай, баруун талдаа далангийн хажуу налуугийн бэхэлгээтэй, зүүн талдаа гэрэлтүүлэгтэй. Хажуу налуугийн далангийн бэхэлгээ хийж дууссаныхаа дараа явган замынхаа хучилтыг хийнэ” гэв.
Харин Дэлхийн банкны санхүүжилтээр “Иж бүрэн гудамж, зам” бодлогын хүрээнд хэрэгжиж буй Хайлаастаас Дарь эхийг холбосон 3.2 км авто зам нь дөрвөн эгнээтэй бөгөөд явган хүний замтай, үерийн хамгаалалтын далантай юм. Зам дагуу байрласан шугам сүлжээг шилжүүлэх ажлыг гүйцэтгэж байна.
°C