Засгийн газрын энэ долоо хоногийн хуралдаанаар Нийгмийн даатгалын тухай хуулийн шинэчилсэн төслийг хэлэлцэж, УИХ-д өргөн барихаар төлөвлөж байна.
Ерөнхий сайд Н.Учралын хэлснээр, тэтгэврийн шинэчлэл нь Засгийн газрын тэргүүлэх бодлогын нэг байх бөгөөд шударга, тогтвортой тогтолцоог бүрдүүлэхэд чиглэх аж.
Шинэчлэлийн хүрээнд хувийн нэмэлт тэтгэвэр, ахмад настны баталгаат тэтгэвэр, мөн нийгмийн даатгалын шимтгэлээ өндөр хэмжээгээр төлсөн иргэдэд түүнд нь тохирсон хэмжээний тэтгэвэр олгодог тогтолцоог бий болгохоор тусгажээ.
Тэрбээр өнөөгийн тэтгэвэр бодох аргачлалд алдаа байгааг онцолж, ахмадуудын тэтгэврийн хэмжээ харилцан адилгүй байгаа нь олон асуудал дагуулж буйг дурдсан юм. Мөн тэтгэврийг хувь хэмжээгээр нэмэгдүүлэх нь бага тэтгэвэртэй иргэдэд төдийлөн үр өгөөжгүй, харин бүх хүнийг ижил хэмжээний тэтгэвэртэй болгох нь олон жил өндөр шимтгэл төлсөн иргэдийн эрх ашигт нийцэхгүй гэж үзэж байгаагаа илэрхийлсэн.
Тиймээс шимтгэл төлөлт болон тэтгэврийн хэмжээг илүү шударга уялдуулах шинэ тогтолцоо шаардлагатай байгааг Ерөнхий сайд онцолсон.
°C