УИХ-ын Эдийн засгийн байнгын хорооны өчигдрийн (2025.10.07) хуралдаанаар Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслийн хоёр дахь хэлэлцүүлгийг хийлээ.
УИХ-ын гишүүн Ө.Шижир “Монгол Улсад өнөөдөр Засгийн газраас бусад салбар ажлаа хийж байгаа. Засгийн газар л ажлаа хийхгүй, улстөржиж байна. Төрийн дээр нам гарчхаар ингэдэг юм. Уг нь байр нь өөр байх ёстой юм. Намын зовлон нь төрийн зовлон болоод түмэн олноо хайхрахаа больчихсон.
2026 оны төсвийг “хүн төвтэй төсөв” гээд их гоё тодотгож, Засгийн газрын мега төсөл хүн байна гэсэн. Тэгсэн хэр нь багш, эмч нарын цалинг өгөхгүй гэж байна. Багийн эмч нарт сард ногдох 30 литр бензинийг ч өгч чадахаа больсон, энэ Засгийн газар. Гэтэл өөрсдийнх нь урсгал зардал багадаа 5 дахин, ихдээ 500 дахин өссөн. Урсгал зардлаа бүгдээрээ нэмээд л байна. Алт, зэс, нүүрсний үнэ ирэх жил унахад урсгал зардлаа дийлэхгүй хэмжээнд ирлээ.
Бид мөнгөгүй биш мөнгөтэй улс, манай сайд нар "мөнгө байхгүй" гээд хоосон халаас тэмтрээд байдаг. Бодит байдал дээрээ бид маш их мөнгөтэй. Сүүлийн таван жилд (2026 оныг оруулаад) 162 их наяд төгрөг үрж байна. Гэтэл асуудлыг нь шийдсэн нэг ч салбар алга.
Сургууль, цэцэрлэг, онцгой байдлын асуудлаа яагаад зээлээр шийднэ гээд байна вэ?. Хүн төөрчихвөл яах юм бэ, зээлээр шийднэ, зээл орж ирээгүй байна гээд сууж байх юм уу. Гал түймэр гарвал зээл хөөцөлдөж байгаа, мөнгө байхгүй гээд сууж байх юм уу. Засгийн газар ийм болчихлоо” гэв.
°C