Сонгуулийн ерөнхий хороо “Үндэсний номын баяр”-т оролцон Аймаг, нийслэл, сум, дүүргийн иргэдийн Төлөөлөгчдийн Хурлын 2026 оны нөхөн сонгуулийн зохион байгуулалт, Улс төрийн намын тухай хуулийн хэрэгжилт, сонгуулийн боловсрол олгох үйл ажиллагааны талаар иргэд, сонгогчдод мэдээлэл өгч, ном товхимлоор үйлчилж байна.
Аймаг, нийслэл, сум, дүүргийн иргэдийн Төлөөлөгчдийн Хурлын нөхөн сонгууль зургаадугаар сарын 21-нд болно. Таван аймгийн есөн сумын 29 хэсэгт аймгийн иргэдийн Төлөөлөгчдийн Хурлын 9 мандатад нөхөн сонгууль, 15 аймгийн 34 сумын 43 хэсэгт сумын иргэдийн Төлөөлөгчдийн Хурлын 38 мандат, нийт 47 мандатад нөхөн сонгууль зохион байгуулна. Нөхөн сонгууль товлон зарласан 16 аймгийн Сонгуулийн хороо, номын сантай хамтран аймгийнхаа төвд “Үндэсний номын баяр”-т оролцож “Сонгогчийн өдөрлөг” зохион байгуулж байгаа юм.
Үүнээс гадна Сонгуулийн ерөнхий хорооны асарт улс төрийн намын санхүүжилтийн ил тод байдлын талаар Сонгуулийн ерөнхий хорооны албан хаагчид сонгогч, нам эвсэл, иргэдэд мэдээлэл өгнө.
Сонгуулийн ерөнхий хороо Үндэсний номын санд “Сонгуулийн боловсрол, эрх зүйн уншлагын танхим”, аймаг, сумдын Номын санд “Сонгогчийн булан” ажиллуулж байгаа. Номын сангаас сонгуулийн боловсрол, сонгуулийн эрх зүйн мэдээ мэдээлэл авах, уулзалт хэлэлцүүлэг зохион байгуулах талаар мэдээлэл авах боломжтой.
Ахлах ангийн сурагчид, оюутнуудыг хүлээн авах “Сонгуулийн хөтөч”, залуу сонгогчдод зориулсан сургалтын талаар мэдээлэл, танилцуулга хийж байна.
Сонгогч Таныг "Номын баяр"-аар Сонгуулийн ерөнхий хорооны асарт, аймгуудад "Сонгогчийн өдөрлөг"-т зочилж, мэдээлэл аваарай хэмээн урьж байна.
°C