Монгол Улсын Ерөнхий сайд Н.Учрал НҮБ-ын Суурин зохицуулагч Яап ван Хиерден болон НҮБ-ын төрөлжсөн байгууллагуудын удирдлагын багийг (2026.04.29) хүлээн авч уулзан, хамтын ажиллагааны явц, ололт амжилт, цаашдын чиглэлийн талаар санал солилцов.
Ерөнхий сайд Н.Учрал Монгол Улс болон НҮБ-ын хамтын ажиллагааг олон салбарт өргөжүүлж, нийгэм, эдийн засагт өгөөжтэй үр дүн гаргахад НҮБ-ын Суурин зохицуулагчийн газар, түүний удирдлага, баг хамт олон үнэтэй хувь нэмэр оруулж байгаад талархал илэрхийллээ.
Геополитикийн зөрчил, улс орнуудын мөргөлдөөн олон улсын харилцаанд тодорхойгүй, тогтворгүй байдал үүсгэж буй энэ үед дэлхий нийтийн үйл хэрэгт НҮБ-ын үүрэг, оролцоо улам бүр чухал болж байгааг Ерөнхий сайд онцлов.
Тэрбээр мөн энэ онд Монгол Улс НҮБ-д элссэний 65 жилийн ой тохиож буйг дурдаж, ойн хүрээнд хамтран зохион байгуулах арга хэмжээнүүдэд онцгой ач холбогдол өгч буйгаа тэмдэглэлээ.
Монгол Улсын Засгийн газрын бодлого, үйл ажиллагаа Тогтвортой хөгжлийн зорилтуудтай нийцэж байгааг Ерөнхий сайд Н.Учрал тэмдэглээд, Засгийн газар хүний хөгжлийг бодлогын цөм болгож, цахим шилжилтийг хурдасгах, ногоон хөгжилд инновац, хөрөнгө оруулалтыг дэмжих, байгаль орчны доройтлыг сааруулж, нөхөн сэргээх чиглэлд тууштай ажиллахаа илэрхийлэв.
Түүнчлэн өнөөдрийн Засгийн газрын хуралдаанаар Уур амьсгалын өөрчлөлтийн тухай хуулийн төслийг хэлэлцэж, сэргээгдэх эрчим хүч, ногоон хөгжлийг дэмжих чухал ач холбогдол бүхий тогтоол баталсныг онцоллоо.
“Монгол Улс- НҮБ-ын Тогтвортой хөгжлийн хамтын ажиллагааны хүрээ 2023–2027” хөтөлбөрийн хэрэгжилтийг талууд сайшаан үнэлж, цаашид улам бүр үр дүнтэй, ажил хэрэгч хамтын ажиллагааг өргөжүүлэхэд санал нэгдэв.
Мөн НҮБ-аас Монгол Улсад 2028–2032 онд хэрэгжүүлэх таван жилийн үйл ажиллагааны хөтөлбөрийг боловсруулахдаа Монгол Улсын урт болон дунд хугацааны хөгжлийн бодлоготой уялдуулна гэдгээ Суурин зохицуулагч Яап ван Хиерден мэдэгдлээ.
Тэрбээр Монгол Улсын Засгийн газар ногоон хөгжлийг бодлогын тэргүүлэх чиглэл болгож байгаад талархал илэрхийлээд, сэргээгдэх эрчим хүчийг хөгжүүлэх чиглэлээр Ерөнхий сайд болон түүний танхим чухал шийдвэрүүд гаргаж буй нь НҮБ-ын бодлого, зорилттой нийцэж байгааг онцлов.
Монгол Улс Цөлжилттэй тэмцэх тухай НҮБ-ын конвенцын Талуудын 17-р бага хурлыг амжилттай зохион байгуулах бэлтгэл хангахад НҮБ-ын Суурин зохицуулагчийн газар болон төрөлжсөн байгууллагууд дэмжлэг үзүүлэн хамтран ажиллаж буйд Ерөнхий сайд Н.Учрал талархал илэрхийлээд, хурлын бэлтгэл ажлыг эрчимжүүлж, тулгамдсан асуудлуудыг шуурхай шийдвэрлэхэд онцгой анхаарч ажиллана гэлээ.
°C