Цагдаагийн ерөнхий газрын Эрүүгийн цагдаагийн албанаас гуравдугаар сарын 19-нд мэдээлэхдээ, Нэгүүн.мн сайтын сэтгүүлч “хувийн нууц мэдээлэл нийтэлнэ” хэмээн сүрдүүлж, иргэнээс 50 сая төгрөг авсан байж болзошгүй нөхцөл байдал тогтоогдсон гэж мэдэгдсэн. Мөрдөн шалгах ажиллагааны явцад уг мөнгийг Нэгүүн.мн сайтын нэр дээрх дансанд шилжүүлсэн нь нотлох баримтаар тогтоогдсон байна.
Тэгвэл шүүхээс өнөөдөр /2026.04.10/ Нэгүүн.мн сайтын сэтгүүлч Л.Баяржаргалыг нэг сарын хугацаагаар цагдан хорих шийдвэр гаргалаа.
Тэрбээр уг шийдвэртэй холбогдуулан байр сууриа илэрхийлэхдээ Монголын хууль хяналтын байгууллагууд, тэр дундаа эрүүгийн цагдаа болон прокурорын байгууллагын үйл ажиллагааг шүүмжилсэн юм. Түүний хэлснээр, өөрийг нь цагдан хорих саналыг зургаа дахь удаагаа гаргаж байгаа нь хууль зүйн үндэслэлгүй бөгөөд тухайн хэрэгт холбогдох нотлох баримтыг өнөөг хүртэл хангалттай бүрдүүлж чадаагүй гэж үзэж буйгаа илэрхийлжээ. Мөн өмнө нь шүүхээс “нотлох баримт хангалтгүй” гэсэн үндэслэлээр хэргийг буцааж байсан ч дахин дахин хорих санал оруулж байгаа нь хууль бус үйлдэл хэмээн онцолсон байна. Одоогоор уг асуудалтай холбоотойгоор хууль хяналтын байгууллагуудаас албан ёсны дэлгэрэнгүй тайлбар хийгдээгүй байна.
°C
Сэтгэгдэл (0)
Сэтгэгдэл бичигдээгүй байна