Өнөөдрийн Засгийн газрын хуралдаанаас 469 ажлын байр цөөлж 16.3 тэрбум төгрөг хэмнэлт хийлээ. Энэ удаагийн бүтцийн цомхотголд Яам болон засгийн газрын агентлагууд багтсан байна.
Яамны хувьд авч үзвэл 16 яамны 1,980 орон тооноос 168 орон тоог цомхотгож 1,812 болгожээ. Ингэснээр удирдах албан тушаал 81, гүйцэтгэх албан тушаал 87-оор цөөрч, 6.3 тэрбум төгрөгийг хэмнэх юм.
Харин агентлагуудын тухайд авч үзвэл нийт Засгийн газрын 35 агентлагийн 3,353 орон тооноос 301 албан хаагчийг цомхотгож 3,052 болсон байна. Үр дүнд нь хэлтэс, албаны дарга 54-өөр нийт 301 орон тоо цөөрч, 10 тэрбум хэмнэх юм байна.
Дээрх хэмнэлтийн ажлын хүрээнд Төрийн албаны 469 албан хаагч цомхотголд орсон бол төсөвт 16.3 тэрбум төгрөгийн хэмнэлт үүсэх юм байна.
Мөн өнөөдрийн Засгийн газрын ээлжит хуралдаанаар 2026 онд ус, цахилгаан, дулаан зэрэг төрөөс үзүүлдэг бүх үйлчилгээний үнэ тариф, төлбөр хураамжийг нэмэхийг тариф тогтоодог сайд, бүх агентлагийн дарга, засаг дарга нарт хориглох шийдвэрийг гаргасан юм.
°C