Сөрөг хүчний нэгдэл
Энэ оны 8-р сарын 31 өдөр АН-ын Үндэсний бодлогын хорооны хуралдаан Төрийн ордонд болж АН-ын даргад дөрвөн хүн нэр дэвшин өрсөлдөнөөс хамгийн олон буюу 196 хүний саналаар УИХ дахь АН-ын бүлгийн дарга О.Цогтгэрэл АН-ын даргаар сонгогдсон юм. Ингэснээр бүтэн сонгуулийн гурван цикл дараалан ялагдал хүлээн АН-ын тухайд арай гэж эв зүйгээ олж нэгдсэн нь сүүлийн хэдэн жилийн хамгийн том ололт байлаа.
Эрх баригчдын эрх мэдлийн төлөөх тулаан
100 жилийн түүхтэй улс төрийн ууган нам хэмээн өөрсдийгөө тодотгосоор ирсэн МАН-д харш жил байлаа. Бүтэн 9 жилийн турш төр барьсан тэд удаад хэн илүү эрх мэдэлтэй вэ? гэдгээ үзлээ. Ёстой нөгөө “нэгийгээ үзэж нэхий дээлээ уралцав” гэдэг боллоо. Тулааны тавцанд У.Хүрэлсүх, Г.Занданшатар тэргүүтэй ах нар болон экс Ерөнхий сайд Л.Оюун-Эрдэнээр ахлуулсан ЛО бүлэг мөн “ганц дайчин ганцаардахгүй” гэсээр МАН-ын ялалтын менежер Д.Амарбаясгалан нарын дунд явагдсан юм.
Тулаан дуусахад У.Хүрэлсүх, Г.Занданшатар нар ялалтын тугаа өргөсөн бол Л.Оюун-Эрдэнэ тийм ч их хохирол амсалгүй үлдсэн бол хамгийн том хохирогч нь Д.Амарбаясгалан болж хэлмэгдэгч нь УИХ-ын дэд дарга Х.Булгантуяа болсон юм.
Харин хамаг том эрх мэдлийг Н.Учрал атгаж чадсан. Түүний хувьд “ах” намын тулаан эхэлсэн үеэс л дараагийн намын дарга гэсэн мэдээлэл хөвөрсөн ч хүлээцтэй байж чадсаны эцэст МАН-ын дарга хэмээх хамаг том даргын албан тушаалыг УИХ-ын даргын тамгатай хамт атгасан явдал байлаа. Гэхдээ түүний өмнө “ах” намын ялалтын буухиаг үргэлжүүлэх гэсэн хамгийн том сорилт тулгаран үлдсэн юм.
Тэгвэл эцсийн сумаа ч хайрлалгүй тавьсан Г.Занданшатарын тухайд Засгийн газраа хэрхэн яаж авч үлдэх вэ? гэсэн асуултын хариултыг олж чадахгүй хэвээр дахин түүний Засгийн газрыг унагахаар сөрөг хүчин ажиллаж эхэлсэн юм.
Ядаж байхад “яр” гэгчээр эдийн засгийн нөхцөл байдал түүний талд байсангүй. Нүүрсний борлуулалт багассан нь төсөвт сөрөг нөлөөг үзүүлж 90-ээд оноос хойш анх удаа төрийн албан хаагчдын үр дүнгийн урамшуулалыг төр олгож чадалгүй он дуусаж байна.
Дэлхийг байлдан дагуулсан Монголчууд
Орондоо орох завгүй олзлон тэмцэлдсэн улс төрийн дуулиан шуугианы хажуугаар эх орноо дэлхий дахинаа эерэг сайнаар сурталчилан таниулсан сайхан мэдээг спортын залуус ард түмэндээ дуулгасаар нэгэн оныг үдэж байна.
3х3 сагсан бөмбөгийн охид
Энэ жилийн 6-р сард манай улс 3х3 сагсан бөмбөгийн дэлхийн аварга шалгаруулах тэмцээнийг эх орондоо амжилттай зохион байгуулсан. Энэхүү тэмцээнд оролцсон манай улсын охидын шигшээ баг түүхэн амжилтыг авчирсан юм. Тэд сагсан бөмбөгийн эх орон болсон АНУ-ын баг тамирчдыг ардаа орхиж Дэлхийн аваргын мөнгөн медалийг эх орондоо авчирч чадсан юм. Тэдний энэ амжилт Монголчууд бидний бахархал болон үлдэж байна.
"Physical: Asia
Олон улсын стрийминг үйлчилгээгээр дэлхийд тэргүүлэгч "Netflix"-ийн алдартай контентуудын нэг болох "Physical-100"-ийн дараагийн шинэ улирал "Physical: Asia" нэртэйгээр азийн 8 орныг оролцуулсан. Тус шоу нэвтрүүлэг өнгөрсөн 9-р сард дэлхий даяар цацагдсан. Тус нэвтрүүлэгт манай улсын баг тамирчид оролцон хоёрдугаар байрт шалгарсан юм. "Physical: Asia” шоуны Монголын баг өөрсдийн тэсвэр тэвчээр, хүч чадлаараа эх орноо дэлхий даяар сурталчилсан нь бидний нэгэн бахархал болсон юм.
°C