Энэ долоо хоногт Оюутолгойн бүлэг ордын нээлттэй сонсгол олны анхаарлын төвд байна. Эл сонсголд Оюу Толгойтой үг үсэг холбогдсон 300 гаруй гэрчийг дуудсан юм. Тэдний нэг нь Сангийн сайд асан С.Баярцогт. Түүний хувьд Оюутолгойн гэрээг үзэглэх үед Сангийн сайдаар ажиллаж байсан төдийгүй энэ асуудлын загалмайлсан эцэг гэж болохоор чухал хүмүүсийн нэг.
“Оюутолгойн гэрээний номыг надаас өөр бүтэн уншиж, судалсан хүн байхгүй” гэсэн нь ч үнэн. Тиймдээ ч сонсголд зориулж төрийн ордонд чемодан дүүрэн баримттай ирсэн цорын ганц, анхны монгол хүн болов.
Тэгвэл Оюутолгойн сонсголд хэлсэн түүний онцлох үгс юу байв. Сонирхоцгооё.
- “Оюутолгойг авах нь Оросуудын ашиг сонирхол шүү”.
- "Оюутолгойн хөрөнгө оруулалт хийгдсэний хүчинд манай улс 2008, 2009 оны эдийн засгийн хямралыг амжилттай давж гарсан".
- Та нар хаалттай хурал хий. Тэгвэл би яаж үүлэн чөлөөний наран дундуур энэ гэрээг хийж чадсан гэдгээ ярина!
- "Монголчуудын хувьд өр гэдэг нь төлж чадахгүй болсон зээлийг хэлдэг. Гэтэл Оюутолгойн хувьд үйл ажиллагаагаа санхүүжүүлсэн л нэг хэлбэр. Англи хэлний financing debt, Монгол хэлний өр гэдэг 2 өөр ойлголт. Financing debt гэдэг санхүүгийн орчинд санхүүжилтийн бүх аргыг оруулдаг. Гэтэл Монголд өр гэдэг өөр ойлголт. Шууд ингэж орчуулж ярих буруу".
- "Хан Ресурс" дээр бид эвлэрлийн гэрээ хийгээгүйгээс болж маш их алдагдал хүлээсэн. Ийм сургамжуудаа давтахгүй байх ёстой. Хүмүүс маш их улстөржиж байна.
- "Дубайн гэрээгээр Оюутолгойн гэрээг муужруулсан. Манай Засгийн газрын алдаа нь өөрсдөө ажлаа хариуцахгүй, урд тал руугаа чихээд байдаг. Үе үеийн Засгийн газар үүнийг хийгээд л явах ёстой. 2009 онд энэ гэрээг байгуулсан. 2011 онд сайжруулсан. 2015 онд Дубайн гэрээгээр муужруулсан. 2019 онд сайжруулсан. Энэ Түр хорооны үр дүнгээр гэрээ сайжрах байх гэж бодож байна" гэв.
Эцэст нь хэлэхэд "Оюутолгой бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх" УИХ-ын Хянан шалгах түр хорооны сонсгол ямар үр дүнд хүрэхийг олон нийт өндөр хүлээлттэйгээр ажиглаж байна. Сонсгол өнөөдөр хоёр дахь өдрөө үргэлжилж байна. Өнөөдрийн сонсголд нийт 84 гэрч оролцохоор байгаа юм. Тухайлбал, УИХ-ын гишүүн асан З.Энхболд, "Фортуна" Батбаяр, Л.Гүндалай, Д.Лүндээжанцан нар оролцохоор иржээ.
Оюутолгойн бүлэг ордын нээлттэй сонсгол энэ Баасан гараг хүртэл үргэлжлэх юм.
эх сурвалж: reelnews,mn
-17°C