Монгол Улсын Төрийн шагналыг анх 1946 онд Д.Нацагдоржийн “Сүхбаатарын намтар” хэмээх түүхэн зохиолд олгож байжээ.
Зөвхөн Монгол Улсын Ерөнхийлөгчийн зарлигаар олгодог уг Төрийн шагналыг шинжлэх ухаан, танин мэдэхүйн шинэ онцгой туурвил, анхдагч шинэ техник, технологи, урлаг, утга зохиолын шилдэг гарамгай бүтээлд хүртээх талаар журамлагдсан байдаг.
Тэгвэл энэ 2025 оны бүтээлд нэр дэвшүүлэхээр хүргэгдсэн бүтээлүүдээс амьдралын эх булаг, ундарга болсон устай холбоотой хамтарсан бүтээлийг Шинжлэх ухааны академийн Физик, технологийн хүрээлэнгээс нэр дэвшүүлсэн байна.
Тухайлбал Монгол Улсын гавьяат багш, физик-математикийн шинжлэх ухааны доктор Х.Цоохүү, МУИС-ийн Химийн тэнхимийн эрхлэгч, химийн ухааны доктор, профессор О.Болормаа, физикийн ухааны доктор Н.Тэгшбаяр нарын “Монгол орны ундны усан дахь уран” нэгэн сэдэвт хамтын бүтээлийг дэвшүүлжээ.
Физик, химийн салбарын эрдэмтдийн баг 2012 оноос эхлэн 10 гаруй жилийн хугацаанд Монгол орны 304 сум, 3 тосгоныг гүний уст цэгүүдээс 1000 гаруй дээж авч, физик, гидрогеохимийн шинжилгээ хийж, эрдсүүдийг тодорхойлсон бөгөөд энэ ажлын чухал хэсгүүдийн нэг болох усны уран, хүнд элементүүдийн агуулгыг тодорхойлж, “Монгол орны ундны усан дахь уран” нэртэй сэдэвт хамтын бүтээл туурвисан байна.
Сонирхуулахад төрийн соёрхол хүртсэн зарим бүтээлийн статистикаас харвал ихэнхдээ утга зохиол, урлаг, дуу хөгжим давамгайлж байсан бол сүүлийн жилүүдэд шинжлэх ухааны суурь болон хавсарга судалгааны бүтээлд илүү их хүртээдэг болжээ.
°C