УИХ-ын даргыг огцруулах тухай асуудлыг өнгөрсөн долоо хоногт УИХ-д өргөн барьсан. Тэгвэл өнөөдөр дахин УИХ-ын дэд дарга Б.Пүрэвдоржид дахин өргөн барьсан байна.
УИХ-ын дарга Д.Амарбаясгаланг УИХ-ыг удирдах нь ёс зүйн хувьд зохимжгүй гэж үзэн УИХ-ын нэр бүхий 22 гишүүн өнгөрсөн долоо хоногт хэвлэлийн бага хурал хийж олон нийтэд мэдэгдсэн. Дээрх мэдэгдлээс хойш удалгүй тэдний шаардлага албажиж УИХ-ын тухай хуулийн 12.2.3-т заасны дагуу УИХ-ын даргыг огцруулах санал болон хувирсан. УИХ-ын даргыг огцруулах дээрх санал УИХ-ын нэр бүхий 57 гишүүн гарын үсэг зурсан нь аль хэдийн хэвлэлд нээлттэй болсон. Тэгвэл өнөөдөр нэгэнт УИХ-д өргөн барьсан бичгээ дахин УИХ-д өргөн барьсан нь анхаарал татлаа.
Магадгүй УИХ-ын даргыг огцруулах тухай саналыг УИХ-д өргөн барьсан ч хэлэлцэх асуудлын тов дараалалд орж ирээгүй сандаргасан байж болох талтай. Нөгөө талдаа УИХ-ын даргыг огцруулах тухай саналыг хэлэлцэх тухай хуулийн хугацаа байхгүй УИХ-ын нэр бүхий гишүүдийг яарахад хүргэсэн байж болох талтай.
Хэдийгээр УИХ-ын даргыг огцруулах тухай асуудлыг хэлэлцэх хуулийн тодорхой хугацаа байхгүй ч гэсэн энэ асуудлыг хэлэлцэхгүй орхиж болохгүй асуудал. Тиймээс эрт оройгүй УИХ-ын хэлэлцэх тов дараалалд орох нь ойлгомжтой.
Мөн дээрх мэдээллийг УИХ-ын хэвлэл мэдээллийн газраас бус Засгийн гарын хэвлэл мэдээлэл олон нийттэй харилцах газраас хэвлэлийнхэнд түгээсэн нь анхаарал татах нэг өнцөг.
Уг нь бол УИХ-д өргөн барьж байгаа хуулийн төсөл болон бусад асуудлын талаарх мэдээллийг УИХ-ын хэвлэл мэдээллийн газраас нэгдсэн байдлаар олон нийтэд мэдээлсээр ирсэн. Харин энэ удаад энэ зарчимыг Засгийн газрын хэвлэл мэдээлэл олон нийттэй харилцах газар өөрчилсөн нь хачирхалтай төдийгүй сэтгүүлчдийн дунд төөрөгдөл үүсгэсэн асуудал боллоо.
°C