Азийн Олимпын Зөвлөл (AOC)-ийн ивээл дор зохион байгуулагдах залуучуудын Азийн наадам энэ сарын 22-ноос 31-нийг дуустал Бахрейн Улсад болно.
Хамгийн сүүлд 2013 онд БНХАУ-ын Нанжин хотод залуучуудын наадам болсноос хойш янз бүрийн шалтгаанаар хойшлогдсон юм. Энэ удаагийн наадмыг Узбекистан Улс нутагтаа хүлээн авахаар бэлдэж байсан ч цар тахлын улмаас барилгын ажил эхлээгүй тул 2024 онд нэрээ татсан билээ.
26 спортын төрөлд 259 багц медалийн төлөө шар тивийн 45 орноос 4,000 гаруй тамирчин өрсөлдөнө.
Харин Монгол Улсаас 20 спортын төрөлд 135 тамирчин оролцохоор болсныг Монголын Үндэсний Олимпын Хороо (МҮОХ)-ноос зарласан байна.
Тус наадамд өрсөлдөх Монгол Улсын шигшээ баг тамирчдад хүндэтгэл үзүүлэх, үдэн гаргах ёслол өчигдөр Монголын үндэсний олимпын хорооны өмнөх “Бөртэ Чоно” талбайд болжээ.
“Бахрейн 2025” Азийн Залуучуудын наадмын Монголын багийн ахлагчааар Монгол Улсын Тэргүүн шадар сайд бөгөөд Эдийн засаг хөгжлийн сайд Н. Учрал ажиллах бол Монголын багийн тугчаар волейболын тамирчин Цэнд-Очирын Ананд, сагсан бөмбөгийн тамирчин Батбаярын Эмүжин нар сонгогдсон аж.
°C